Mundua -
Krisi energetikoa
Putinek Nord Stream 2a berraktibatzea eskaini dio Europari Baltikoko sabotajearen ostean
Errusiako presidenteak Estatu Batuak, Polonia eta Ukraina jo ditu "nazioarteko terrorismo ekintza" baten onuradun nagusitzat.
Agentziak | EITB MEDIA
Vladimir Putin Errusiako presidenteak adierazi du Nord Stream 2 gasbidearen bitartez gasa Europara bidaltzeko prest dagoela. Arrazoi politikoengatik baztertutako proiektua da, eta Moskuk Itsaso Baltikoan egin berri diren sabotaje ekintzen ondoren aldarrikatu du.
Putinen hitzetan, sabotaje hori "nazioarteko terrorismo ekintza" izan zen, eta, horren ondorioz, Nord Stream 1 ez da erabilgarria jada, nahiz eta irailaren hasieran zerbitzua eten ostean ez erabili hornidura iturri gisa.
Putinek adierazi duenez, Nord Stream 2 konpondu daiteke eta, beraz, martxan jarri. Hori ez zen inoiz gertatu, Alemaniak errepresalia gisa baztertu baitzuen proiektua, Errusiak Ukrainan egindako erasoaldi militarra hasi ondoren.
Errusiako presidentea energiari buruzko foro batean agertu da asteazken honetan, eta adierazi du Nord Streameko sabotajeak "aurrekari arriskutsua" ezartzen duela eta Europar Batasunarekiko harremanak are gehiago oztopatzea helburu duela, albiste-agentzia ofizialen arabera.
Hitzaldian, Putinek sabotajearen errua inori leporatzea saihestu du, baina Ukraina, Polonia eta Estatu Batuak aipatu ditu onuradun nagusitzat, azken bi herrialde horiek garrantzia irabaziko luketelako energiaren esportatzaile edo bideratzaile gisa.
Hala ere, ziurtatu du Errusiak bere gasa munduko merkatuan jarri ahal izango duela, Txinarekin eta Turkiarekin irekita jarraitzen duten konexioei esker, eta petrolioaren esportazioetan ondorioak izatea baztertu du, gutxienez 2025era arte berdin jarraitzea aurreikusten baitu.
