Palestinak eta Israelek zalantzan jarri dituzte balizko aurrerapausoak

Israeldarrek eta palestinarrek zalantzan jarri dituzte, igande goizean, Israelgo Gobernuaren eta Palestinar Aginte Nazionalaren arteko bake-negoziazioetan John Kerry Estatu Batuetako diplomazioaren nagusiaren arabera egondako balizko aurrerapenak.

"Zalantza handiak ditugu Mahmud Abbasek akordioa lortzeko duen jarrerarekin", esan du Yuval Steinitz Arazo Estrategietarako ministro israeldarrak; Saeb Erekat negoziatzaile palestinarren nagusiak, bitartean, Israeli eskatu dio kokalekuak egiteari eta Zisjordanian etxebitzitzak eraisteari uzteko (hori da, izan ere, negoziazioetako punturik polemikoenetakoa). Kerryk, bere aldetik, bakearen eremurako balizko akordio bat lortzeko aurrera egin dutela ziurtatu du.

"Aginte Nazionalaren aldetik, antisemitismo handia ikusten dugu, hori da oztoporik handiena akordio bat adostu ahal izateko", nabarmendu du Steinitzek; Erekatek Kerryren ahalegina babestu nahi izan du, eta esan du AEBko estatu-idazkaria hilabete honetan bertan buelta litekeela lurraldera. “Palestinarrak dira Kerryren ahaleginarekin onurarik handiena ateratzen direnak, eta palestinarrak dira galtzeko gehien dutena, negoziazioek huts egiten badute”, adierazi du Erekatek. Arabiar komunitatean, azpimarratu duenez, babes handia ari da izaten bake prozesu hau.

John Kerry: "Aurrerapenak, bakearen eremurako balizko akordio bat lortzeko"

Bitartean, John Kerry AEBko estatu-idazkariak esan du larunbatean palestinarrek eta israeldarrek "aurrerapenak" egin dituztela "bakearen eremurako balizko akordio bat lortzeko bidean", nahiz eta oraindik haraino heldu ez diren. Hiru orduz egon da bilduta Kerry Zisjordanian Mahmud Abbas presidentearekin.

"Azken bi egunotan izandako elkarrizketek etekina emango dutelakoan nago", esan du, "zenbait auzi ere konponduta geratu direlakoan", eta, gainera, "beste kontu batzuek aukera berriak dituzte orain". Jordanian eta Saudi Arabian egongo da Kerry igandean, bere lanarekin jarraitzeko.