Gizartea -
ARABA
Gasteizko Mitika diskoteka itxita egongo da 31 urteko gizonaren heriotza argitu bitartean
Mitika aretoak "samina eta atsekabea" adierazi du pasa den asteburuan diskotekaren atarian gertatutako heriotzagatik. Halaber, doluminak helarazi dizkie hildakoaren senide eta gertukoei.
AGENTZIAK | EITB Media
Gasteizko Mitika diskotekak iragarri du itxita egongo dela pasa den asteburuan dantzalekuaren atarian izandako heriotza argitzen den bitartean. Igande goizaldean 31 urteko gizon bat hil zen eta gertaera horri lotuta atxilotutako atezaina espetxeratu dute, homizidio edo hilketa delitua egotzita.
Bake kalean izan zen heriotza, 04:50 aldera, Mitika diskotekaren atarian, hain zuzen ere. 112 SOS Deiak larrialdi zerbitzuak abisua jaso zuen, ohartarazteko dantzaleku baten atarian gizon bat lurrean zegoela, konortea galduta.
Itxuraz, atxilotutako atezainak emandako zartako baten eraginez erori zen mutila, eta buruan hartutako kolpearen ondorioz hil zen.
Mitika diskotekak asteazken honetan sare sozialetan oharra kaleratu du lokalaren atarian gertaturikoagatik "samina eta atsekabea" agertzeko, eta hildakoaren senide eta gertukoei doluminak helarazteko.
Dantzalekuaren kudeatzaileek azaldu duenez, agintariak elkarlanean ari dira gertaturikoa argitzeko.
Errespetua agertu asmoz eta ikerketak aurrera egin bitartean, beraz, itxita egongo da.