33 urteko gizon bat larri zauritu da lan-istripu batean, Iruñean, aldamio batetik erorita

33 urteko gizonezko bat larri zauritu da gaur arratsaldean Iruñeko Labrit pilotalekuan izandako lan-istripu batean. Aldamio batetik erori da.

Foru Gobernuak jakinarazi duenez, SOS Nafarroa 112 zerbitzuko Larrialdiak Kudeatzeko Aretoak 13:31n jaso du istripuaren berri, eta Cordovilla parkeko suhiltzaileak bertaratu dira, bizi-euskarri aurreratuko anbulantzia batekin eta Iruñeko Udaltzaingoaren patruilekin.

Istripua izan duen langileak politraumatismoak izan ditu, 14 metroko altueran zegoen aldamio batetik erori ostean. Osasun zerbitzuek bertan artatu ondoren, Nafarroako Unibertsitate Ospitalera eraman dute, larri.

Iruñeko Udaltzaingoa istripuaren arrazoiak ikertzeaz eta atestatua bideratzeaz arduratzen ari da.