Sei gizon atxilotu dituzte Mallorcan talde bortxaketagatik

Polizia Nazionalak sei gizon, 20 urte inguruko turista alemaniarrak, atxilotu ditu, Playa de Palmako (Mallorca) hotel batean herrialde bereko neska gazte bat taldean bortxatzea leporatuta.

Atxilotuak Polizia Nazionalaren Palmako egoitza nagusian dauzkate eta epailearen aurrera larunbatean pasako direla aurreikusten da. Polizia Nazionalaren Familiak eta Emakumeak Artatzeko Unitatea (UFAM) ari da gertatutakoa ikertzen.

Erasoa atxilotuak ostatu hartzen ari ziren hotelean gertatu zen ostegun goizaldean. Neskak hoteleko langileei laguntza eskatu zien eta Polizia Nazionaleko agenteak haien deia jaso ondoren bertaratu ziren.

Goizeko 03:40ak aldera bost gazte atxilotu zituzten hotelean bertan. Seigarrena, berriz, handik ordu batzuetara atzeman eta atxilotu dute.

Biktima osasun-etxe batean artatu zuten lehendabizi. Ondoren, Son Llatzer unibertsitate-erietxera eraman zuten.