Gizartea -
KORONABIRUSA
CureVac txertoak % 47ko eraginkortasuna du behin-behineko analisien arabera
Alemaniako CureVac botika etxearen txertoaren entsegu klinikoetan lorturiko emaitzak ez dira esperotakoak izan. Munduko Osasun Erakundearen arabera, txertoa baimentzeko gutxienekoa % 50ekoa da.
AGENTZIAK | EITB MEDIA
Koronabirusaren aurkako CureVac txertoak ez ditu aurreikuspenak bete saiakuntza klinikoaren hirugarren fasean; izan ere, txertoak % 47ko eraginkortasuna du behin-behineko datuen arabera. Ez da % 50era iritsi, eta hori da bai Munduko Osasun Erakundeak (MOE) eta baita Ameriketako Estatu Batuetako Elikagai eta Sendagaien Agentziak (FDA) ezarritako gutxienekoa txertoa baimentzeko.
Franz-Werner Haas Alemaniako botika etxeko zuzendari exekutiboak onartu du ez dituztela esperotako emaitzak izan behin-behineko analisietan. Haren esanetan, ordea, saiakuntza klinikoarekin jarraituko dute, amaierara arte: "Litekeena da eraginkortasuna aldatzea".
Europar Batasunean covid-19ari aurre egiteko onartu nahi zuten bosgarren txertoa izan behar zuen, Pfizer-BioNTech, Moderna, AstraZeneca eta Janssen txertoen atzetik.
Europar Batasunak CureVac txertoaren 405 milioi erosteko akordioa lortu zuen.
Osakidetzako Biodonostia eta Biocruces Osasun Ikerketako Institutuek ere parte hartu dute CureVac Alemaniako enpresa farmazeutikoaren txertoaren eraginkortasuna eta segurtasuna aztertzeko saiakuntza klinikoan.
Horren harira, Gotzone Sagardui Osasun sailburuak jakinarazi du CureVac haiekin jarri dela harremanetan, eta txertoaren saio klinikoekin jarraitzeko asmoa agertu duela.
Bestalde, Europako Sendagaien Agentziak berretsi du etengabe aztertzen segituko duela txerto alemaniarra, eta saio klinikoen emaitzak aztertuko dituela baimenaz erabakia hartzeko.
