Gizartea -
GIPUZKOA
Irungo banketxe batean lapurreta egitera sartu direnen bila ari dira
Ertzaintzako unitate bereziak barrura sartu dira, baina ez dute inor aurkitu. Bilaketa operatiboak zabalik jarraitzen du eta Irun erdiguneko Colon pasealekua eta Luis Mariano kaleak hesitu dituzte.
EITB MEDIA | AGENTZIAK
Irungo Colon pasealekuan dagoen Santander bankuaren bulegora ustez lapurreta egitera sartu den pertsona baten bila ari da Ertzaintza. Armatuta dagoela uste dute. 09:40ak aldera Ertzaintzaren unitate bereziko kideak sukurtsal barrura sartu dira. Oraingoz ez dute inor aurkitu eta ingurura zabaldu dute bilaketa.
Ertzaintzaren unitate bereziak Irungo Colon pasealekuan dagoen Santander bankuaren kanpoaldean. Argazkia: EFE
Ertzaintzaren hesia, Irun erdigunean. Argazkia: EFE
Segurtasun Sailak zabaldutako informazioaren arabera, Colon pasealekuan kokatuta dagoen sukurtsaleko langileek horman zuloa zegoela ikusi dute eta 07:10 aldera larrialdi zerbitzuei ohartarazi diete. Antza denez, inguruko atari batetik zuloa eginda sartu dira barrura.
Ikerketako iturrien esanetan, bi langile horiek ustezko lapurra ikusi dute eta korrika atera dira bertatik.
Abisuaren berri izan ondotik, Irun erdiguneko Colon pasealekua eta Luis Mariano kalea hesitu ditu Ertzaintzak.
09:40 aldera Ertzaintzako unitate bereziak sukurtsal barrura sartu dira, baina ez dute inor topatu.
11:00etan Luis Mariano kalea, Colon pasealekua eta Zabalguneko plaza itxita zeuden.
Ertzaintzaren bilaketa operatiboak zabalik jarraitzen du.
Eusko Jaurlaritzako Segurtasun Sailetik ez dute oraingoz baieztatu lapurreta gauzatzea lortu duten ala ez.
