Donostiak hiritar merezimenduak aitortu ditu bere egun handiaren atarian

Hiritar Merezimenduaren Dominak banatu ditu Eneko Goia Donostiako alkateak igande honetan, hiriko egun handiaren atarian. Zeremonian saritu dituztenen artean hainbat entitate edo elkarte daude: ekintzaile sozial bat eta animaliak babesteari, gaixotasun mentalari, adingabe transexualei eta Txernobyleko haurrei loturiko elkarteak.

Jesus Rubio Raymond ekintzaile soziala, Itziar Mintegui animaliak eta landareak babesteko elkarteko kidea, buruko gaitzak dituzten pertsonen bizi-kalitatea hobetzeko lan egiten duen Why Not Fundazioa, Naizen Elkartea (Chrysallis) eta erradiazioaren ondorioak jasaten dituzten ume errusiar eta bielorrusiarrak hartzen dituen Bikarte Kultura saritu dituzte aurten.

Zeremonia "kutunenetarikoa" duela onartu du alkateak, hiriaren "arima" ordezkatzen duten pertsonak eta elkarteak goraipatzen dituelako, San Sebastian egunaren bezperan.

Itziar Minteguik jaso du domina aurrena. Duela 23 urte lursail bat erosi zuen, Igeldoko aterpea eraikitzeko. Orduz geroztik, 10.000 animalia baino gehiago hartu ditu.

Animalien "maitasun eskuzabalak" ekimena aurrera eramatera bultzatu zuela azpimarratu du Minteguik. Animaliak babesteko elkartea zuzentzea "ez da erraza izan", onartu du sarituak.

Iñaki Rubio Raymond Oronako sortzailea izan da hurrena. Donosti Zaharra izeneko 84 etxe erregimen kooperatiboan eraikitzea bultzatu du. "Boluntariotza betebehar soziala da", nabarmendu du Rubiok.

Amaia Aretxaga Bikarte Kultura Elkarteko kideak gogorarazi duenez, elkartearen sorreratik, 1997tik, Errusiako eta Bielorrusiako 1.700 haur baino gehiagok Euskadin denboraldiak igarotzea lortu dute.

Aretxagak eta programako bi neskatok domina eskertu dute: "eskerrik asko" eta "spasiva" Donostia.

Pablo Munilla Why Not Fundazioko sortzailearen ahotan, buruko gaitzen bat duten pertsonen "bakartasuna saihestu" eta "lagundu" nahi dute fundazioko kideek. Gaurkoarekin "norbait" babesa aurkitzeko hurbiltzen baldin bada, helburu "oso garrantzitsua" lortuko lukete.

Dominen banaketari Naizen Elkarteak eman dio amaiera. Olatz Marcos Perez de Lazarraga elkarteko ordezkariak "ume" transexualei eman die meritua, euren familiei "nortzuk diren esateari utzi ez diotelako", nahiz eta "egunero zalantzan jartzen dituen eta eraso egiten dien gizarteari aurre egin behar".