Larrabetzuko jaietan izandako eraso sexista gaitzesteko elkarretaratzea egin dute

Goizaldean, Larrabetzuko jaien azken egunean, bi neska taldek pairatu duten eraso sexista salatu du ostiral arratsalde honetan Larrabetzuko Udalak (Bizkaia).

02:00ak aldera, aurpegia maskara batekin estalita eta beroki bat jantzita zeraman gizonezko bat bi neska taldeengana hurbildu da, oso jarrera oldarkorrarekin. Udaletik jakitera eman dutenez, lekutik ihes egitea lortu dute neskek.

Orduan, inguruan bizi diren bizilagun batzuk kalera irten dira erasotzailearen atzetik. Ertzaintzak geroago atxilotu du gizona. Handik denbora gutxira, eraso sexista pairatu duten bi emakumek salaketa jarri dute Galdakaoko polizia-etxean.

Udalak eraso sexista irmotasun osoz gaitzetsi du, eta gertatutakoa salatzeko elkarretaratzea egin du arratsaldean.

_________________________

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan.