Gizartea -
Donostia
Urtarrilaren 20an banatuko dituzte Hiritar Merezimenduaren Dominak
Aurreko urteetan urtarrilaren 19an banatu dituzte, baina aurten ez dutenez Urrezko Danborrik emango, ekitaldia egun bat atzeratu dute.
Agentziak | Erredakzioa
2017ko Hiritar Merezimenduaren Dominak urtarrilaren 20an banatuko dituzte Donostian, Gipuzkoako hiriburuaren egunean. Hala erabaki du asteazken honetan Donostiako Udalak, Urrezko Danborra bertan behera geratu ostean. Aurreko urteetan, urtarrilaren 19an egin dute Hiritar Merezimenduaren Dominak banatzeko ekitaldia.
Donostiako Udalak ohar baten bidez jakinarazi duenez, Aspanogi elkarteak, Uliako Gimnastikak, Kemen elkarteak, Jakintza Ikastolako bederatzi neskak eta Javier Hernaez Uranga Altzako parrokoak jasoko dute 2017ko Hiritar Merezimenduaren Domina. Ekitaldia 12:30ean hasiko da, Donostiako Udaletxeko Udalbatza-Aretoan.
Aurreko urteetan, urtarrilaren 19an banatu dituzte dominak, baina aurten ez dutenez Urrezko Danborrik emango, Udalak erabaki du dominak Gipuzkoako hiriburuaren egunean bertan banatzea.
2017ko Urrezko Danborra Angels Barcelo kazetariari ematea proposatu zuten, baina ez du babesik lortu (PSE-EEk ez du parte hartu eta gainerako alderdi politikoak abstenitu egin dira), eta saria bertan behera geratu da.