Leihotik behera botatako umeak larri jarraitzen du ospitalean

Atzoko eraso matxistan, Gasteizen, zauritutako 17 hilabeteko haurrak egoera larrian jarraitzen du Gurutzeta Unibertsitate Ospitaleko Zainketa Intentsiboko Unitatean. Hasiera batean, Arabako Unibertsitate Ospitalera eraman zuten. Amiltzeak eragindako politraumatismoa, garezurreko traumatismoa eta burezur barneko hipertentsio errefraktarioa ditu, Osakidetzak azken mediku agirian azaldu duenez.

18 urteko ama, berriz, egonkor dago. Goizean, eta arrazoi humanitarioak kontuan hartuta, bere alaba dagoen ospitalera eramango dute.

Azkenik, ustezko erasotzaileak uko egin dio deklaratzeari Ertzaintzaren aurrean, eta epailearenera eramango dute jada.

Bestalde, “gertakari larri” horien aurrean “atsekabea” azaldu du gaur Gasteizko Udalak. Gainera, erasoa “irmo gaitzetsi” du. Bestalde, “sumario-sekretua lehenbailehen altxatzea eta gertatutako guztia argitzea” espero du Gasteizko Udalak.

Epaileak kasua sekretupean jarri du, baina ikerketako iturriek zabaldutakoaren arabera,  gizonak sexu-abusuak egiten zizkion haurrari, Aliciari, eta bikotekideak harrapatu zuenean, leihotik behera bota zuen, Euskadi Irratiak azaldu duenez.

Elkarretaratzea

Bestalde, Gasteizko Plataforma Feministak elkarretaratzea deitu du, indarkeria matxista gaitzesteko. Kontzentrazioa Andre Maria Zuriaren Plazan egingo dute, 19:30ean, talde horrek jakinarazi duenez.

Euskadiko Guraso Bananduen Federazioak (Kidetza) ere salatu du astelehen honetan Gasteizen izandako erasoa, eta “gaitz larri honi aurre egiteko” eztabaida bat hastea eskatu du. “Gaitzespen adierazpenetatik ekintzetara pasatu behar dugu”, azpimarratu du.

Genero indarkeriak haurrengan dituen ondorioez ohartarazi du Save the Children erakundeak

Euskadiko Save the Children erakundeak erasoak gaitzetsi ditu, eta indarkeria matxistak haurrengan dituen ondorioez ohartarazi du. Horren hitzetan, "haurren giza eskubideen urraketa izugarria da".

Erakundeak haurren kontrako indarkeria mota guztiak salatu ditu, eta genero indarkeriaren biktima diren haurren babesa bermatzeko beharrezkoak diren baliabideak erabiltzea eskatu du.

"Erakundeek eta gizarteak jabetu behar dute zeinen garrantzitsua den indarkeria erabiltzen ez den etxe batean haztea", Save the Childrenek ohar bidez adierazi duenez. Aipaturiko erakundeak sinadura bilketa hasi du haurrak indarkeria mota guztietatik babestuko dituzten legeak egitea eskatzeko alderdi politikoei eta Espainiako Gobernuari.