Ekonomia -
Hipotekak
Euriborrak behera egin du laugarren hilabetez jarraian, eta % 3,53an itxi du uztaila
Horrela, 30 urterako 150.000 euroko hipoteka aldakor batek, % 0,99ko diferentziala gehi Euriborra duenak eta bere interes-tasa berrikusi behar duenak, jaitsiera txiki bat izango du bere kuotan, hilean 56,6 eurokoa; hau da, ia 680 euro urtean.
Agentziak | EITB Media
Euriborrak % 3,526an itxi du uztaila; beraz, laugarren hilabetez jarraian behera egin du.
Uztaileko datua 12,4 puntu txikiagoa da ekainean erregistratutako % 3,65 baino. Era berean, 62,3 puntu behera egin du duela urtebete erregistratutako % 4,149aren azpitik.
Horrela, bankuen arteko erreferentzia-tasak balio txikiena markatu du 2023ko urtarriletik, Europako Banku Zentralaren (EBZ) interes-tasen igoeren zikloa oraindik erdibidean zegoenean.
Horren ondorioz, 30 urterako 150.000 euroko hipoteka aldakorra kontratatuta duen pertsona batek, % 0,99ko diferentziala gehi Euriborra duenak eta uztaileko Euriborrarekin bere interes-tasa berrikusi behar duenak, hilean 56,6 euroko jaitsiera izango du kuotan; hau da, ia 680 euro urtean.
"Iaz bizi izan genuen goranzko epearen ondoren, Euriborrean ikusten ari garen beherakada logikoa da, batez ere hipoteken merkatuan nolabaiteko baikortasuna ikusten dugulako EBZk oporretatik bueltan interes-tasen jaitsierarekin jarraitzeari begira", adierazi du Simone Colombelli Hipotecas de iAhorro enpresako zuzendariak.
HelpMyCash konpainiako adituen arabera, "litekeena da Euriborrak behera egitea, pixkanaka-pixkanaka, eta azken hiruhilekotik aurrera areagotu egingo da beheranzko erritmoa. Urtea % 3,25 eta % 3,50 arteko balioarekin itxiko duela aurreikusten dugu". Beraz, etorkizuna positiboa dirudi datozen hilabeteetan interesa berrikusiko zaien tasa aldakorreko hipotekadunentzat.
Baikorragoak dira Asufin elkartekoak; izan ere, erreferentziazko tasa % 3,20 ingurura jaistea espero dute irailean, eta 2024a % 3 inguruan ixtea.