Minbizia duen jubilatu batek 360.000 euro eskatu dizkie Sidenorri eta CIE Legazpiari, amiantoa tarteko

Gipuzkoako langile erretiratu batek 366.000 euroko kalte-ordaina eskatu die Sidenor Altzairu Bereziak eta CIE Legazpia enpresei, birikietan duen adenokartzinomaren errudun direla iritzita. Izan ere, salaketan jaso dutenez, lanean ari zenean amiantoa arnasteagatik dago gaur egun gaixorik salatzailea.

Eibarko Epaitegian aztertuko dute salaketa, datorren asteazkenean. Han, Amiantoaren Biktimen Euskal Elkarteak (Asviamie) elkarretaratzea egingo du, langileari babesa eskaintze aldera, eta kaltetutako beharginentzat kalte-ordain funts era dezatela eskatzeko.

Xabier B.Z. beharginari lanak eragindako ezintasun iraunkor absolotua aitortu zion Gizarte Segurantzako Institutu Nazionalak. Patricio Etcheverria Altzairuak enpresarentzat egin zuen lan honek, 1970 eta 1991 bitartean. Horregatik, salaketan, enpresa horren ondorengoei eskatu die kalte-ordaina.

Asviamiek ziurtatu du amiantoa arnastu zuela beharrean, eta enpresak ez zuela horren aurrean inolako segurtasun neurririk hartu, alegia, ez zituela garai hartako araudiak exijitutako neurriak bete. Arrazoi beragatik, bi enpresa horiek kalte-ordainak ordaindu behar izan dizkiela mesoteliomak jota zendutako bi langileren sendiei.