Interes tasen igoerak kredituen merkatuari eta enpresen sorkuntzari eragiten diela ohartarazi du Kutxabankek

Kutxabankek azpimarratu du kredituen merkatuak atzera egin duela eta enpresa proiektu berrien sorkuntza ere mantsotu egin dela azken hilabeteotan interes tasetan izan den gorakadagatik.

Eduardo Ruiz de Gordejuela Kutxabanken kontseilari ordezkariak Bilboko Ganberaren egoitzan egindako agerraldi batean adierazi duenez, sektorearentzat "albiste txarra" da ekonomia hoztu izana eta kredituen merkatuak atzera egin izana. Horregatik, albiste ontzat hartu du interes tasek "goia jo" izana eta "hortik aurrera beherakadak" egotea.

"Tasa positiboak eta neurrizkoak izatea da osasungarriena finantza sektorearentzat eta ekonomiarentzat", gaineratu du.

Kutxabanken arduradunak zehaztu du oraingoz ez dela berankortasun "gorakadarik" izan interes tasen igoeragatik, baina aitortu du kredituen merkatuak atzera egin duela eta enpresa proiektu berrien sorkuntza gelditu egin dela.

Bestalde, azpimarratu du Kutxabank negozioaren iraunkortasuna ziurtatzeko lanean ari dela eta, horretarako, enpresen negozioan, kontsumoaren finantzazioan, aseguruetan eta energia trantsizioan ari direla jartzen arreta.