Ekonomia -
Erosketa
Eroskik 22 merkataritza-lokal saldu dizkio Lar Españari
Toledon dagoen Parque Abadia merkataritza-zentroa ere erosi du enpresa horrek, 63,1 milioi euroren truke.
Agentziak | Erredakzioa
Lar España enpresak astelehenean jakitera eman duenez, Eroski taldeari 22 merkataritza-lokal erosi dizkio 47,6 milioi euroren truke. Lokal horietako hamar Euskadin daude, zazpi Balear Uharteetan, bi Nafarroan, beste bi Kantabrian, eta, azkena, Errioxan.
Jose Luis del Valle Lar Españako presidentearen arabera, bankuaren finantziazioa lortu eta astebetera erosi dituzte lokal horiek. Del Valleren hitzetan, horrek argi uzten du enpresa zein eraginkorra den.
Guztira 22.822 metro karratu hartzen dituzten 22 merkataritza-gune horiez gainera, Toledon (Gaztela-Mantxa) dagoen Parque Abadia merkataritza-zentroa erosi du Lar Españak, 63,1 milioi euroren truke.