Ekonomia -
2016ko aurrekontua
Urkulluk aitortu du defizitaren murrizketak aurrekontua mugatzen duela
Lehendakariak iragarri du 11.000 milioi euro ingurura helduko dela, baina "gastua handitzeko tartea txikia" izango dela, egonkortasun eta defizitaren kontrol printzipioengatik.
agentziak | erredakzioa
Iñigo Urkullu lehendakariak iragarri du EAEk 2016an izango duen aurrekontua 11.000 milioi euro ingurura iritsiko dela eta "gastua handitzeko tartea txikia" izango bada ere, osasuna, hezkuntza eta babes soziala lehenetsiko dituztela.
"Oinarrizko zerbitzuak eskaintzeko gai izango gara", adierazi du Urkulluk Diario Vasco egunkariak antolatutako enpresa ekitaldi batean. Eneko Goia Donostiako alkatea, Markel Olano Gipuzkoako ahaldun nagusia, Arantza Tapia Garapen Ekonomikorako sailburua eta Angel Toña Enplegu eta Gizarte Politikako sailburua ere ekitaldian izan dira.
Lehendakariak esan du "akordiorako irekita" daudela eta PSE-EEren lankidetza "berritzea" duela helburu, "azken bi urteetan garrantzitsua" izan delako.
Datorren urteko aurrekontuan "egonkortasun eta defizitaren kontrol printzipioak" egongo direla adierazi du, eta aurtengo defizita "500 milioitik behera" geratuko dela, eta hiru urte barru "zero" izango dela.
"11.000 milioi eurora iritsiko da aurrekontua, eskaera sozialak igoko dira, eta imajina dezakezue zer suposatzen duen defizita murrizteak. Zuhurtzia etorkizunerako inbertsioa dela pentsatzen dugu", azpimarratu du Gipuzkoako Ganberan emandako hitzaldian.
Lehendakariak berretsi du defizita murrizteak "mugatu" egiten duela aurrekontua, baina aurrekontuak onartzeko akordioa "zuhurtzian" oinarritzen den arren, "elkartasuna eta hazkundea" ere badirela ezaugarri nagusiak.
Era berean, Jaurlaritzak beste bi lehentasun "gehigarri" omen ditu: “Berrikuntza eta enplegua sustatzea, gazteen enplegua bereziki”.
