Han Kang hegokorearrak jasoko du Literaturaren Nobel saria

Suediako Zientzien Errege Akademiak Han Kang hegokorear idazleari emango dio Literaturaren 2024ko Nobel saria, "trauma historikoei heltzen dien eta giza bizitzaren hauskortasuna agerian uzten duen prosa poetiko indartsua" baitu.

1970eko azaroaren 27an jaio zen Kang, Gwangju hirian, eta Literatura Sorkuntzako eskolak ematen ditu Seuleko Institutuan, idazteaz gain.

2016an, Man Booker International Prize saria (2019an izena aldatu zuen, eta Booker Prize izena hartu) irabazi zuen Begetarianoa eleberriari esker.

Euskaraz, ez dago haren lanik irakurgarri.

Literaturaren Nobel saria 117 aldiz banatu dute, 1901etik, eta, Kang kontuan hartuta, 18 emakumek irabazi dute harrezkero. 10.000.000 suediar koroako saria jasoko du Kangek, 980.000 eurokoa.