Pablo Itoizek Anaitasunarekin berritu du, denboraldi batez, 2026ra arte

Pablo Itoizek Helvetia Anaitasunarekin berritu du, 2026ko ekainaren 30era arte, Nafarroako klubak asteartean iragarri duenez. Anaitasunaren harrobiko taldeetan hazita, Itoizek, 21 urtekoa bera, Quique Dominguez entrenatzailearen konfiantza bereganatu du, 2024-25 denboraldian. Kontratua ekainean amaitzen zitzaion, baina jokalariak eta klubak adostu dute urtebetez luzatzea.

Jokalariak 2022ko maiatzaren 21ean egin zuen debuta Anaitasunaren lehen taldean, Balonmano Logroñoren aurkako partida batean; ordutik, Ligako 58 partida jokatu ditu, eta 49 gol sartu, horietako 25 jokoan dagoen denboraldian.

Itoiz, hala, jokalari garrantzitsua da talderako. Beste gazte batzuk ere ari dira erantzun oso ona ematen, Marco Moreno eta Xavi Gonzalez kasu; hurrenez hurren, 37 eta 59 gol daramatzate denboraldian.