Zaldibar Argitu: "Denak berdin jarraitzen du. Hasieran bezala gaude"

100 egun bete dira otsailaren 6n Zaldibarko zabortegia behera etorri zentik. Jokin Bergara Zaldibar Argitu plataformako bozeramaileak  Euskadi Irratiko Goiz Kronika saioan salatu duenez, egoer ez da ezertan aldatu eta "hasieran bezala gaude".  Ez direla gorpuak aurkitu eta inork ez duela erantzukizun politikorik hartu esan du. "Badaude izen batzuk eta kargu politiko batzuk, sinbolikoki ere, kasu honekin oso argi lotzen direnak. Iñaki Arriola egungo Ingurumen sailburua da bat". Eta horregatik, Bergarak dio, "justizia kontu bategatik" dimisioek mahai gainean egon behar dutela. "Oraindik urrats txikiena ere ez da eman", gogorarazi du.

Edonola ere, aste honetan jakin da Europar Batasunak ikerketa abiatuko duela, eta "positiboki" baloratzen dute. "Eskandalo demokratiko eta publiko hutsa" argitzeko bidean, interes "neutroa" izango duela espero dute plataformako kideek. "Egoeraren larritasunaren berri emateko beste eragile bat sartzen da, eta kontraesana dago, Arriolak esan zuelako Eusko Jaurlaritzaren jokabidea tatxarik gabekoa izan zela", gehitu du.

Gaur,  balkoietatik kaleetara eramango dute aldarria. Zaldibarren, Elgetan eta Zallan elkarretaratzeak egingo dituzte goizean eta arratsaldean. Egoerak hala behartuta, "distantziamendu soziala mantenduta" egingo dira bilkurak.