Madrilgo Lurralde Auzitegiak Begoña Gomezen aurkako ikerketa mugatzeko agindu dio Peinado epaileari

Madrilgo Lurralde Auzitegiak Begoña Gomezen —Pedro Sanchez Espainiako Gobernuko presidentearen emaztea— aurkako ikerketa mugatzeko agindu dio gaur, astelehena, Juan Carlos Peinado epaileari, baita Globaliaren erreskateari lotutako zatia ikerketatik at uzteko. Hala ere, Juan Carlos Barrabesen enpresekin ustez duen harremanaren inguruan ikertzen jarraitzeko argi berdea eman dio. 

Gogora dezagun Begoña Gomezen aurkako ikerketa abiatu zuela Peinado epaileak iragan apirilean, influentzia-trafikoa eta negozioetan ustelkeria egotzita. 

Lurralde Auzitegiak gaur berrekin dio Fiskaltzak aurkeztutako helegiteen azterketari, zeinak Peinado epailearen ikerketa mugatzea eskatzen duen, eta kasua artxibatzea eskatu duen defentsaren eskaera alboratu du. 

Auto horren arabera, Juan Carlos Peinado Madrilgo 41. Instrukzio Epaitegiko buruak daraman ikerketak baztertu egin beharko du Begoña Gomezek 2020ko Globaliaren erreskatean ustez izandako papera, "eduki inkriminatzailea suposatzen duen eduki berria agertzen ez diren bitartean".

Hala ere, Juan Carlos Barrabesen enpresekin ustez duen harremanaren inguruan ikertzen jarraitzeko argi berdea eman dio, zeinak hainbat kontratu publiko dituen. 

Magistratuek azaldu dutenez, 2021 eta 2022 bitartean aipatu enpresak 21 milioi eurortan baloratutako hamaika kontratu publiko izan zituen hainbat administraziotan. 

Halaber, Begoña Gomezek Madrilgo Unibertsitate Konplutentsean (UCM) zuzendutako "beste enpresa eta erakunde batzuekin lotutako jokabide batzuk" ikertzea onartzen du epaileak, "katedra eta masterrak sortu, asmatu, sustatu, eta garatzeagatik".

Lurralde Auzitegiak "bere jarduera ikertzea beharrezkotzat" jotzen du eta "interes profesionaletik haratago, enpresa munduarekin loturiko interes pertsonalak" egon daitezkeela uste du; izan ere, zuzendu duen masterrarekin bat datorren enpresa baten administratzaile da Gomez.