GALi buruzko ikerketa batzordea eratzea posible dela esan dute Kongresuko abokatuek

GALi buruzko ikerketa batzordea eratzea galarazteko arrazoirik ez dagoela ondorioztatu dute Kongresuko zerbitzu juridikoek. Aitzitik, Felipe Gonzalez Espainiako Gobernuko presidente ohia deklaratzera deitzeko egindako eskaria atzera botatzearen alde egin dute.

Ameriketako Estatu Batuetako inteligentzia agentziak (CIA) 80ko hamarkadan egindako ikerketa baten arabera, GAL taldea Felipe Gonzalezek sortu zuen. Informazio hori publiko egin ostean, EH Bilduk Gonzalezen nahiz Fernando Grande-Marlaska Barne ministroaren agerraldiak eskatu zituen, gai horri buruz Kongresuan azalpenak eman ditzaten.  

Europa Press agentziak zabaldu duenez, Kongresuko abokatuak bi eskaera horiek atzera botatzearen aldekoak dira. Bi arrazoi nagusi eman dituzte: alde batetik, Kongresuaren papera Gobernua kontrolatzea dela, baina Felipe Gonzalez dagoeneko ez dela gobernuko kidea;  eta bestetik, egungo Barne ministroari ez dagokiola bere agintalditik kanpo gertatu ziren jazoerei buruzko galderak erantzutea.  

Alabaina, EH Bilduk, EAJ, ERC, Junts, BNG eta CUP alderdien babesarekin, beste eskaera bat ere erregistratu zuen: ikerketa batzorde bat eratzea Felipe Gonzalezek GAL taldearekin izan zuen lotura argitzeko. Kasu horretan, Kongresuko abokatuek ez dute inolako eragozpenik jarri.

Gauzak horrela, Kongresuko Mahaiak astearte honetan erabakiko du zer egin. Organo horretan PSOEk, PPk, Unidas Podemosek eta Voxek dute ordezkaritza.  

Unidas Podemosek –PSOEren bazkidea Espainiako koalizio-gobernuan- hasiera batean esan zuen ez zuela ikerketa hori egiteko beharrik ikusten, baina ondoren atzera egin eta proposamena babestuko zuela iragarri zuen.

Eskakizuna tramitatzea onartuko balute ere, ez litzateke bermatuta egongo ikerketa batzordea martxan jartzea; izan ere, eztabaida osoko bilkurara eramatea galarazi dezakete PSOEk eta PPk Bozeramaleen Batzordean.