Politika -
Kutxabanken etorkizuna
EH Bilduk Kutxabanken kudeaketa utziko duela uste du Egibarrek
"Erabakiak hartu behar diren bakoitzean eta erantzukizunak hartu, distantzia hartzeko aitzakiak erabiltzen dituzte, tartean ez sartzeko", adierazi du.
Erredakzioa
Joseba Egibar EAJren Eusko Legebiltzarreko bozeramaileak uste du Bilduk Kutxabanken kudeaketa utziko duela fundaziora igarotzeko "erabakia hartzeko momentua heltzen denean".
Onda Vascan elkarrizketa eskaini du eta Egibarrek aitortu du "Erabakiak hartu behar diren bakoitzean eta erantzukizunak hartu, distantzia hartzeko aitzakiak erabiltzen dituzte, tartean ez sartzeko, ez modu pertsonalean ezta talde moduan ere", adierazi du, koalizio abertzaleari buruz.
"Duela hamabost egun, Kutxaren batzordean, aho batez onartu zen (baita ezker abertzalearen partaideekin ere) 2011ko irailean Bilduk berak EAJrekin, PSE-EErekin eta PPrekin lortu zuten akordioa: %100 kutxen esku mantentzea, legeak aurkakoa aginduko ez balu edota erakunderen batek aurkakoa esango ez balu", adierazi du.
Halere, Xabier Iturbe Kutxako presidenteak talde guztiak lantalde batean parte hartzera gonbidatu zituela gogoratu du, "banku-fundazio batera igarotzeko trantsizioa ahalik eta akordio zabalenarekin lortzeko" eta Bilduk "pentsatu behar dutela eta ez dutela erantzunik" esan zuen, Egibarren hitzetan.
"Arrazoibideekin, proposamenekin eta mobilizazioen deialdiekin erantzuten duena ezker abertzalea da", adierazi du GBBko presidenteak.
Horregatik, erratzea gustatuko litzaiokela aitortu du, baina uste du "banku-fundaziora aldatzera hartzeko erabakia heltzen denean, ezker abertzaleak ezezkoa kaletik emango duela eta ez Batzodearen kide gisa hartutako erabakien erantzule eginez".
