Donald Trump laugarrenez inputatu dute: Hauek dira bere kontrako auziak

Donald Trump Ameriketako Estatu Batuetako presidente ohiari bata bestearen atzetik iristen ari zaizkio inputazioak. Dagoeneko, lau aldiz inputatu dute: Georgian 2020ko AEBko hauteskunde emaitzak iraultzen saiatzeagatik, Stormy Daniels auziagatik, sekretupeko dokumentuengatik, eta Kapitolioaren aurkako erasoagatik. 

Georgiako hauteskunde emaitzak

Abuztuaren 15ean iritsi da laugarren inputazioa, 2020ko AEBko Presidentetzarako hauteskundeetan Georgiako emaitzak iraultzen saiatzeagatik.

Georgiako epaimahai batek Donald Trump AEBko presidente ohiaren eta beste 18 pertsonaren aurkako karguak aurkeztu ditu. Horien artean daude Rudy Giuliani New Yorkeko alkate ohia eta Mark Meadows kabinete buru ohia.

Akusazio txostenaren arabera, presidente ohiari 13 kargu leporatzen dizkiote, tartean, kargu publiko bati bere juramentua urratzeko eskatzea edo kargu publiko baten itxurak egiteko konspiratzea. Hala ere, Trumpen eta gainerako auzipetu guztiei egozten dioten deliturik larriena Georgiako ustelkeriaren aurkako legea urratzea da, eta, baieztatuz gero, espetxe zigorra ezar diezaiekete.

Halaber, Georgiako 2020ko hauteskunde emaitzak iraultzeko konspirazio kriminal baten parte izatea leporatzen diete 19 auzipetuei.

Kapitolioaren aurkako erasoa

Donald Trump Ameriketako Estatu Batuetako (AEB) presidente ohiari lau delitu egotzi zizkioten 2020ko hauteskundeen emaitzak aldatzen saiatzeagatik (Joe Biden demokrata izan zen irabazlea).

Washingtongo epaimahai batek honako karguak leporatu zizkion: AEBri iruzur egiteko konspirazioa, prozedura ofiziala oztopatzeko konspirazioa, prozedura ofiziala oztopatzen saiatzea eta eskubideen aurkako konspirazioa.

Era berean, 2020ko hauteskundeetan iruzurra egon zela zabaltzeko eta bere garaipena aldarrikatzeko "gezurrak" esatea leporatzen diote. "Adierazpenak faltsuak ziren, eta akusatuak bazekien faltsuak zirela", akusazio txostenaren arabera.

Halaber, emaitzak legez inpugnatzeko eginahalak egitea, eta botoak ez zenbatzeko "legez kanpoko metodoak" baliatzea egotzi zioten.

Sekretupeko dokumentuak

Miamiko Auzitegi Federalak 37 delitu leporatu zizkion AEBko Gobernuaren dokumentu sailkatuak Mar-a-Lagon (Florida) duen etxera eramatea egotzita. Besteak beste, hauek dira bere kontrako akusazioak: AEBko Gobernuaren instalazioetan soilik egon behar duten dokumentu sailkatuak eta sekretuak legez kanpo atxikitzea, justizia oztopatzea eta konspiratzea.

Auzitegi Federalaren aurrean egindako agerraldian, "erruduna ez" dela adierazi zuen.

Akusazio horren atzean Joe Biden AEBko presidente demokratak bultzatutako "sorgin ehiza" eta "hauteskundeetan eragiteko kanpaina bat" dagoela salatu zuen Trumpek. 

Stormy Daniels

Manhattango auzitegi batek 34 kargu egotzi zizkion Donald Trump AEBko presidente ohiari, Stormy Daniels aktore pornoarekin izandako sexu harremanak ezkutatzeko ordainketa egitea egotzita. 

Delitu horiek guztiak merkataritza-erregistroak "faltsutzearekin" lotuta daude.

Apirilean, Stormy Daniels aktore pornoari 130.000 dolar (120.000 euro baino gehiago) ordaintzea egotzita inputatu zuten. Horrenbestez, kargu kriminalei aurre egin beharko dien AEBko lehen presidente ohia izango da.

Epailearen aurrean, "erruduna ez" dela adierazi zuen.