Mundua -
ERREGAIAK
Errusiak milioi erdi petrolio upel gutxiago ekoitziko ditu egunean
Horrela erantzun dio G7ak, Australiak eta Europar Batasunak Errusiaren petrolio esportazioei jarritako betoari. Errusiaren arabera, merkatu harremanetan "esku hartze" garbia da.
AGENTZIAK | EITB MEDIA
Errusiak milioi erdi upel gutxituko du eguneko bere petrolio ekoizpena martxotik aurrera, G7ak, Australiak eta Europar Batasunak Errusiaren petrolio esportazioei jarritako betoari erantzunez.
"Errusiak bere borondatez milioi erdi upel gutxituko du eguneko bere petrolio ekoizpena. Horrek merkatu harremanak berrezartzen lagunduko du", azaldu die Alexander Novak Errusiako lehen ministrordeak tokiko hedabideei TASS agentzia ofizialaren arabera. Gainera, adierazi du Errusiak ez diela petroliorik salduko zeharka edo zuzenean gehienezko prezioaren mekanismoa (topea) babesten dutenei.
Lehen ministrordeak azpimarratu duenez, merkatu harremanetan "esku hartze" garbia izan da.
Halaber, Errusiako ordezkariak ohartarazi du etorkizunean petrolio eskasia egon daitekeela eta antzeko ondorioak izan daitezkeela beste sektore batzuetan ere.
Otsailaren 5ean sartu zen indarrean Errusiako petrolio produktuak Europara inportatzeko debekua.