Erresuma Batuko tren langileen grebak lanerako itzulera zaildu die herritarrei

Urtea hastearekin batera Gabonetako oporrak amaitu zaizkie askori Erresuma Batuan, eta tren langileen grebak lanerako itzulera hori zaildu die herritarrei. Gaur eta bihar eta urtarrilaren 5ean eta 6an 48 orduko bi greba egun egingo dituzte. Aurrez, abenduaren 24tik 27ra ere greba egin zuten.

Greba RMT Erresuma Batuko tren, itsas eta garraioaren sindikatuak deitu du soldata igoera eskatzeko.

Erresuma Batuan inflazioa % 10etik gorakoa den honetan, sindikatuek soldatak % 7 igotzea eskatzen dute, baina Network Rail enpresak % 5 handitzea proposatu die langileei.

Mick Lynch RMT sindikatuko idazkari nagusiak greba "horrela luzatzea" deitoratu du BBC Erresuma Batuko irrati eta telebista publikoari egindako adierazpenetan, baina salatu du Gobernua ez dela "ezer egiten ari" gatazkarekin amaitzeko. Mark Harper Erresuma Batuko Garraio ministroak, bestalde, soldatak hobetzeko eskaintza errefusatu izana arbuiatu du. "Nahiago nuke piketeak albo batera utzi eta negoziazio mahaira itzuliko balira, enpresariekin erreformei eta soldatei buruzko akordio batera iristeko", gaineratu du.