222 hildako utzi ditu Idai zikloiak Afrikan

Idai zikloiak 222 hildako utzi ditu, dagoeneko, Afrika hegoaldean. Zimbabwe, Mozambike eta Malawi dira herrialde kaltetuenak.

82 hildako zenbatu dituzte Zimbabwen, 84 Mozambiken eta 56 Malawin. Edonola ere, zikloiak eragindako hildakoen kopurua etenik gabe ari da handitzen; 1,6 milioi pertsona bizi dira zikloiak astindutako lurretan.

Ostegun iluntzean iritsi zen zikloia kontinente afrikarrera, Mozambiketik barrena, eta kalte handiak eragin zituen, batez ere, Beira hirian. Besteak beste, bertako 500.000 biztanleak argindarrik eta komunikaziorik gabe geratu ziren.

Zimbabwera ostiralean sartu zen, indarrez sartu ere. Hainbat eskualde guztiz isolatuta geratu ziren, eta Chimanimani parke nazionalean dozenaka turista geratu ziren ez atzera ez aurrera.

Emmerson Mnangagwa Zimbabwekopresidenteak "hondamendi egoera" deitu du, eta eskura dituen baliabide guztiak jarriko dituela hitz eman die herritarrei, egoera bideratzeko eta kalteak zuzentzeko. Hala, herrialde horretako armadak dispositibo bereziak jarri ditu abian gunerik kaltetuenetan.

Nazio Batuen Erakundeak eta bere bazkideek premiazko laguntza bideratzeko deia egin dute. Mozambikerako, esaterako, 40,8 milioi dolar eskatu dituzte, hondamendi naturalak sortutako kalteei aurre egiteko.