Gutxienez 72 hildako bi meskitaren aurkako erasotan, Afganistanen

Gutxienez 72 pertsona hil dituzte bi eraso suizidatan, Afganistanen. Bi meskitaren kontrako atentatuak izan dira, agintarien eta lekukoen arabera. Horietako bat Kabul hiriburuan jazo da, eta bestea Doleenan, Ghor probintzian (herrialdearen mendebaldean).

Terrorista bat Kabulgo meskita xiita batean sartu da Dasht-e-Barchi auzoan, Zaman imanaren tenpluan, hain zuzen ere. Azken orduko otoitzean gertatu da erasoa. Meskita barruan lehergailua zartarazi du erasotzaileak, Mahmood Shah Husaini lekukoak azaldu duenez.

Najib Danish Barne Ministerioko bozeramaileak jakitera eman duenez, gutxienez 39 hildako utzi ditu atentatuak. Inork ez du erasoa bere gain hartu oraindik.

Bestalde, beste terrorista suizida batek gutxienez 33 pertsona hil ditu Ghorreko meskita batean. Atta Mohammad Noor Balj eskualdeko gobernadorearen hitzetan, erasoak ustez Jamiat alderdiko agintari bat zuen helburu.