Mundua -
Immigrazioa
37 etorkinek bizia galdu dute Libiako kostaldean, ontzia urperatuta
Hasiera batean zazpi gorpu aurkitu dituzte, baina, beranduago, eskualdeko arrantzaleek 30 hilotz gehiago topatu dituzte.
Gutxienez 37 etorkin hil dira Libiako kostaldean, zihoazen ontzia hondoratu ostean. Azken egunotako bigarren istripu larria da.
Mohamad al Misrati Libiako Ilargi Gorriko bozeramaileak adierazi duenez, 'goizean zazpi etorkinen gorpuzkiak topatu dituzte Tripoliko ekialdean dagoen Jomseko eskualdean, baina ezin da zehaztu ontzian zenbat etorkin zihoazen'.
Ordu batzuk beranduago, bertako arrantzaleek, 30 etorkinen gorpuak aurkitu dituzte Tripolitik 100 kilometrotara. Ilargi Gorriko boluntarioak eskualdean lanean ari dira, baina ez dute ontzi nahikorik.
Balantzea
Ostegunean etorkinez beteriko beste ontzi bat hondoratu zen Libiako Zuwara hiritik gertu, eta 200 lagun hil ziren. Euren helburua Libiatik Italiara bidea egitea zen.
Urtea hasi denetik 2.300 etorkin baino gehiago hil dira Mediterraneo itsasoa zeharkatu nahian, nazioarteko hainbat immigrazio erakundeek egindako zenbaketen arabera.
