Mundua -
NBEren txostena
Siriako gerrak gutxienez 93.000 hildako utzi ditu
NBEren txosten baten arabera, gatazka hasi zenetik, hilean batez beste 5.000 pertsona hil dira.
Erredakzioa
"Gutxienez" 93.000 pertsona hil dira Siriako gerran, NBEren Giza Eskubideetarako Goi Komisarioak egindako azken zenbaketaren arabera.
"Tamalez, biktimen kalkulu hori seguruenik oso behetik geratuko da; hortaz, hildakoen benetako zenbatekoa askoz ere altuagoa izan daiteke", Navi Pillay Giza Eskubideetarako agintariaren esanetan.
Zortzi iturriren datuekin egindako ikerketa estatistiko bat egin dute, eta, hildakoen identitatea baieztatu ostean, 2011ko martxotik 2013ko apirilera arte Sirian hil diren 92.901 pertsonaren izenekin zerrenda bat osatu dute.
Hala ere, Pillayren ustetan, "aukera handiak daude" zortzi iturri horiek dokumentatu ez dituzten beste hainbat hildako egotea. Horregatik, hildako gehiago egon daitezke.
Bestalde, analisi horren arabera, gatazka hasi zenetik, hilean gero eta pertsona gehiago hiltzen dira.
2011ko udan hilean batez beste mila pertsona hil ziren, baina, 2012ko uztailetik aurrera, kopuru hori 5.000ra handitu da. "Sarraskiak etengabeak dira, uztailetik 5.000 pertsona inguru hil dira hilero", adierazi du Pillayk.
