Gizartea -
LAPURDI
Gizon batek dendari bat bahitu du Bidarten, eta Poliziak tiroz hil du erasotzailea
Erasoa astearte iluntzean gertatu da Bidarteko Erretegia gazta-dendan. Itxuraz, pailazo maskara bat jantzita zuela sartu da, eta sable eta errebolberra eskuetan zituela, mehatxu egin dio emakumeari.
EITB Media
Eraso larria jazo da, bart, Lapurdiko Bidarte udalerrian. 54 urteko gizon batek Bidarteko gazta-denda bateko langilea bahitu du, eta Poliziak tiroz hil du.
19:30 aldera gertatu da Bidarteko Erretegia gazta-dendan, 810 errepide departamentalaren ertzean.
Emakumea saltokia ixten ari zela, gizon bat sartu da pailazo maskara bat jantzita eta sable eta errebolberrarekin mehatxu egin dio.
Lehen ikerketen arabera, Poliziari deitzeko eskatu dio gizonak. Agenteak heldu direnean egiaztatu dute gizona sable eta errebolberrarekin mehatxuka ari zitzaiola dendariari eta tiro egin dio Poliziak.
Larrialdi zerbitzuetako langileak gizona suspertzen ahalegindu badira ere, tokian bertan hil da.
Baionako prokuradoreak bi ikerketa ireki ditu: batetik, autoritate publikoa dutenen kontrako hilketa saiakeragatik, eta, bestetik, poliziak egin duen armen erabileragatik.