Ipuscuatik Gipuzkoara, mila urteko historia

Ipuscua. Izen horrekin dago jasota Gipuzkoa lurralde historikoari buruzko lehen erreferentzia idatzia, 1025eko dokumentu batean. Zaragozako Unibertsitateko liburutegian dago gordeta izkribua eta Altzoko Salbatore Deuna eliza dohaintzan Aragoiko San Juan de la Peña Monastegiaren esku utzi zenekoa azaltzen du.

2025ean mila urte beteko ditu, beraz, Gipuzkoa hitzak, eta hainbat ekintza antolatu dituzte erakunde ezberdinek, urteurrena ospatzeko. Besteak beste, Donostiako San Telmo Museoak 'Ipuscua, 1.000 urte' izeneko erakusketa zabalduko du urtarrilaren 18an, eta maiatzaren 11ra arte egongo da ikusgai. Lehen erreferentzia agertzen den dokumentua erakutsiko da bertan.

Goizane Alvarez Gipuzkoako Foru Aldundiko Kultura diputatuaren arabera, berebiziko garrantzia du izkribu horrek, Gipuzkoari buruzko dokumentazio idatziaren hasiera eta lurraldearen historia ulertzeko ezinbesteko pieza delako. "Gipuzkoaren historia ez da dokumentu honekin hasten, baina, zalantzarik gabe, gure lurraldearen historia eta garapena ulertzeko giltzarria  da", esan du. Bere hitzetan, 1025eko izkribuan idatzitako Ipuscoa izenak argi erakusten ditu lurraldearen berezitasunak eta balioak.

Ospakizun ekitaldien barruan, Tabakalerak ere argazki erakusketa bat hartuko du datorren urtean, egungo Gipuzkoari buruz gogoeta egitea bilatuko duena. Altzoko Udalak, bere aldetik, datozen egunotan aurkeztuko du urteurrenaren harira antolatutako programa.