Oxinorteko "zarata jasanezina" Osasun Sailean salatzea aztertzen ari dira Barakaldoko auzo-elkarteak

Barakaldoko Villamor Auzo Elkartea eta Lutxanako Auzo Etxea salaketa aurkeztekotan dira Eusko Jaurlaritzako Osasun Sailaren eta Udaleko Garapen Iraunkorreko Arloaren aurrean Oxinorte enpresak "gau eta egun egiten duen txistu-hots handia" dela-eta. Izan ere, Lutxana auzoko bizilagunek diotenez, hiru aste daramatzate "zarata jasangaitza" entzuten, eta "inor ez da arduratzen gure osasunaz".

Bi auzo-elkarte horiek azaldu dutenez, enpresak iragarri bezala, "asteburuan zaratak gelditu ziren", baina "asteleheneko lehen ordutik txistuak auzoko pertsonen osasuna kaltetzen jarraitzen du, gau eta egun".

Hori dela eta, Villamor Auzo Elkarteak eta Lutxanako Auzo Etxeak eurekin biltzeko eskatu diote Amaia del Campo Barakaldoko alkateari, argi azal diezaien zer neurri hartzen ari diren arazo hori konpontzeko.

Elkarteek deitoratu dutenez, "abuztuaren 25ean kutsadura akustiko larri hau hasi zenetik, ez Udala eta ez Oxinorte enpresa ez dira harremanetan jarri bizilagunekin", horiek bizi duten egoera euren ahotik entzuteko, ez eta arazoaren inguruko lehen eskuko informazioa emateko ere. 

"Alkateak hedabideetan adierazi du bizilagunekiko elkartasuna, baina oraindik ez die erantzun duela astebete bidali genizkion galderei. Gure ustez, auzoa jasaten ari den egoerak erantzun arinak behar ditu gure udal ordezkarien aldetik, gure osasunean eta gure egunerokoaren garapen normalean eragina duelako", adierazi du.

Egoera horren aurrean, Lutxanako bizilagunek elkarretaratzea egin dute ostiral arratsaldean, Oxinorte enpresaren atarian, "zarata handiari premiazko konponbidea ematea" eskatzeko. Halaber, 2022ko azaroan udalbatzak hartutako erabakia bete dezan eskatu diote Udalari; erabaki horren arabera, Udalak konpromisoa hartu zuen "enpresa kimiko hori Barakaldoko hirigunetik kanpo lekualdatzeko beharrezko ekintzak hasteko".

"Badakigu alkatetzak akordio honen berri baduela. Zergatik ez da ezer egin? Noiz arte jasan behar dugu Lutxanako bizilagunok gure osasunarekin jolastea?", salatu dute Villamor Auzo Elkarteak eta Lutxanako Auzo Etxeak.