Martxoaren 8an udal-langileek greba egiteko erraztasunak izatea eskatu du Eudelek

Emakumearen Nazioarteko Eguna dela eta, Eudel Euskadiko Udalen Elkarteak adierazpen instituzional eredu bat zabaldu du, eta, ohikoa den bezala, Euskal Autonomia Erkidegoko Udal guztiei bidali die, martxoaren 8ra begira hainbat gai kontuan har ditzaten. Adierazpena otsailaren 15ean onartu zuen Eudelen Batzorde Betearazleak, eta egun berean bidali zieten Udalei.

"Bizitzak erdigunera!" agiria elkartean bertan adostu dute, eta erreferentzia eredu gisa proposatu diete Udalei, tokian tokiko errealitateetara egokitu ahal izateko.

Adierazpena gaur bertan irakurriko dute, 12:00etan, Gernikako Batzarretxean, Bizkaiko Batzar Nagusiek antolatutako Euskal Emakume Hautetsien III. Asanbladaren baitan.

Besteak beste, Eudelek egindako proposamenen artean dago benetako berdintasun eraginkorra bermatzen duten politika publikoak garatzea. Horrez gain, zaintza lanak politika publikoen erdigunera eramatea proposatzen du.

Bestalde, martxoaren 8rako Mugimendu Feministak deitutako egun osoko grebaren harira, Eudelek eskaera zuzena egin die Udalei: langileei eta udal hautetsiei greba egiteko aukera erraztea.

Bukatzeko, Eudelek martxoaren 8ko mobilizazioetan parte hartzeko deia egin die herritarrei.