Auzia ireki dute Kordoban sanferminetako taldeari egotzitako erasoaz

Pozoblancoko (Kordoba) 1. Instrukzio Epaitegiko epaileak auzia abiatu du 21 urteko neskak jasandako sexu-erasoa ikertzeko; hain zuzen ere, sanferminetako bortxaketa dela-eta auzipetutako lau gizoni inputatu diete eraso hau.

Andaluziako Justizia Auzitegi Nagusiak jakitera eman duenez, datozen asteotan ekingo diote ikerketari. Biktimari eta lau auzipetuei deklarazioa hartuko die. Halaber, lekukoak deituko ditu, eta auzitegiko medikuaren proba bat ere eskatuko du.

Azterketa toxikologiak aztertuko ditu ere, atxilotutako lau lagunek neskari sustantziaren bat eman zioten jakin ahal izateko. Izan ere, sanferminetan taldean egindako sexu-erasoa ikertzen duen epaileak zantzuak aurkitu ditu ondorioztatu ahal izateko auzipetutako bost lagunetatik lauk sexu-erasoa egin ziotela 21 urteko neskari joan den maiatzean Pozoblancon.