Lanbidek milaka pertsonari laguntzak itzultzea eskatzen jarraituko du

Zenbait kolektibok elkarretaratzea egin dute gaur, asteartea, Arartekoak Bilbon duen egoitzaren aurrean, Diru-Sarrerak Bermatzeko Errenta dela eta emandako laguntzak itzultzeko eskaerak jasotzen ari diren 10.000 familiari “babesik ez” emateagatik. Antza denez, “jaso behar ez zituzten” diru-laguntzak jaso zituzten, eta gaur salatu dute Lanbidek beste 20.000 gutun prest dituela “ondoen datorkionean” bidaltzeko.

Hogei bat familiak Arartekoaren “babes falta” salatu dute, Bilbon duen bulegoaren atarian, “Pobreziaren kriminalizazioari ez” zioen pankarta bat eskuetan zutela. Bertan adierazi dutenez, Lanbidek abiarazitako kanpainak “ez du eragin legalik, laguntzak jaso dituzten pertsonei iruzurra egiten saiatzen da, zorra ordaindu dezaten, jakin barik zelan eta noiz sortu den, zein izan den alegazioak aurkezteko epea, ez beste ezer”, esan du Alex Linares kolektibo horien bozeramaileak.

Horren harian, “iruzur horren bidez, laguntzak galtzeko beldurrez baliatuta, eskubiderik izan gabe ordain dezatela saiatzen dira”, Linaresen arabera.

Bilboko elkarretaratzearen bidez, kolektibook Arartekoaren jarrera kritikatu dute, eta, “nahiz eta bihar joango den, ezin digu esan urriaren 2ko ebazpena ohar informatibo bat dela, eta ez dela ezer gertatuko”.

“Dagoeneko ari da gertatzen (gaineratu du Linaresek); izan ere, 1.300 pertsonak baino gehiagok isuna ordaindu dute, Lanbidek laguntza kenduko dien beldur dira, eta horri ezer bizi dira”. “Ezin da onartu herritarrak defendatzeko sortu den erakunde batek men egitea, berehala alde egingo duen arren”, salatu dute.