Ekonomia -
Protekzionismoa
AEBk % 28ko muga-zerga ezarri die Siemens Gamesa eta Windar konpainien dorre eolikoei
2021ean "dumping"aren aurkako % 73 muga-zerga ezarri zieten behin-behinean. Siemens Gamesak neurriaren aurka egin zuen, eta orain AEBko Merkataritza Auzitegiak zerga portzentajea zenbatekoa izango den erabaki du.
Agentziak | EITB Media
Ameriketako Estatu Batuetako Nazioarteko Merkataritza Auzitegiak erabaki du Siemens Gamesa Renewable Energyk (SGRE), Windar Renovablesek (Windar) eta haren zenbait filialek Espainian fabrikatutako dorre eolikoen esportazioei % 28,55eko muga-zerga ezartzea.
Erabakia urtarrilaren 28an hartu zen, eta astearte honetan argitaratuko da Erregistro Federalean, Estatu Batuetako Aldizkari Ofizialean, eta 2021ean ezarritako dumpingaren kontrako % 73ko zerga murriztea dakar, Siemens Gamesak eskatu bezala.
Siemens Gamesak behin-behineko erabakiaren aurka egin zuen, Merkataritza Departamentuak % 73ko tasa inposatzea "legez kanpokoa" zela argudiatuta.
Lehen ebazpen batean AEBko erakundeek % 73ko muga-zergari eutsi bazion ere, bigarren hausnarketa batean finkatu beharreko batez besteko dumping marjina % 28,55ekoa dela ondorioztatu du.