KPIak lau hamarren egin du gora martxoan, % 3,2raino, eta azpiko inflazioa % 3,3ra jaitsi da

Kontsumorako Prezioen Indizea (KPI) lau hamarren hazi da martxoan, iazko epe berarekin alderatuta, eta % 3,2an kokatu da, INE Espainiako Estatistika Institutuak aurreratutako datuen arabera. 

Argindarraren BEZaren igoerak eta erregaien garestitzeak eraginda izan da igoera. Elikagaien prezioek ere gora egin dute, baina 2023ko martxoan baino gutxiago. 

Otsailean gertatu zen kontrara, hazkundearen bidea hartu du martxoan inflazioak. Aurreko hilabetean % 2,8an kokatu zen KPIa, iazko abuztutik erdietsitako tasarik baxuenean.

Hirugarren hilabetea da jarraian KPIak gora egiten duena (hilabete arteko tasari erreparatuta), eta iazko otsailetik izan duen hazkunderik handiena da. 

Azpiko inflazioari dagokionez (elikagaiak eta energia produktuak kenduta kalkulatzen dena), behera egin du tasak, bi hamarren % 3,3raino. 

Gaur emandako datuak aurreratuak dira, eta Estatistikak baieztatu behar ditu (behin betiko datua apirilaren 12an emango du).