Eusko Jaurlaritzak 'Euskadi bonu iraunkorra'ren jaulkipena atzeratu du

Eusko Jaurlaritzak 'Euskadi bonu iraunkorra'ren jaulkipena atzeratzea erabaki du, bankuen gomendioa jarraituz, "ezegonkortasun politiko" handia baitago Espainian eta Italian, eta horrek Espainiako arrisku sariaren igoera eragin du.

Eusko Jaurlaritzak gaurtik,  maiatzaren 29tik, indarrean sartu nahi zituen bonuok, baina bankuek jaulkipena atzeratzeko eta itxaroteko gomendatu diote Jaurlaritzari.

Urkulluren Gobernuko iturriek jakitera eman dutenez, Espainian Mariano Rajoyren aurkako zentsura mozioaren eztabaidak "ezegonkortasun politikoa" eragin du aste honetan; baita Italian Gobernua osatzeko zailtasunak ere.

Eusko Jaurlaritzak joan den astean aurkeztu zuen euskal erakunde baten bonu iraunkorren lehen jaulkipena, 500 milioi euroko balioagatik. Bonuokin finantzatuko diren programen % 81 proiektu sozialak izango dira, eta % 19 proiektu berdeak.