Navalek ontzi bat ontziolatik kanpo bukatzea proposatu die langileei

Naval ontziolako zuzendaritzak Living Stone itsasontzia ontziolatik kanpo bukatzeko proposamena egin die langileei, urte amaierara arte soldatak ordaindu eta lan erregulazioa indarrean den bitartean prestazioak osatzearen truke.

Horren aurrean, langile batzordeak Arantza Tapia Eusko Jaurlaritzako Ekonomiaren Garapen eta Lehiakortasuneko sailburuarekin bilera bat “berehala” egitea eskatu du, proposamenaren berri eman eta haren iritzia jasotzeko; izan ere, sailburuak duela egun batzuk esan zien komenigarria zela Navalen eraikitzen diren ontziak ontziolatik ez ateratzea, inbertsoren berriren bat iristea errazte aldera.

Gainera, batzordeak eskatu du joan den ostiralean aukeratu zuten ontziolaren administrazio kontseilu berriarekin biltzea, konpainiaren egoeraren aurrean beraien “asmoen eta jardunbideen” berri izateko.

“Ziurgabetasuna”

Pedro Gonzalez batzordeko presidentearen hitzetan, langileak gero eta urduriago daude, laster lan erregulazioko espedientea indarrean sartuko dutelako, hartzekodunen konkurtsoa “gertu” dagoelako eta “ziurgabetasuna gero eta handiagoa delako”. “Zalantza asko dauzkagu, itsasontziak bukatu gabe. Egunero, kontu ezezagun berriren bat aurkitzen dugu”.

Manuel del Dago Miamin finkaturiko asturiar enpresaburuaren berri ba ote duten galdetuta (ontziolaren zabalkundearen % 80 bere gain hartzeko asmoa agertu zuen, baina ez zuen gauzatu), Gonzalezek esan du “ofizialki” ez dakitela ezer.

Amaitzeko, batzordeak herritarrak bultzatu ditu ostegunean, irailak 21, Sestaoko ontziolan abiatu, Portugalete zeharkatu eta Santurtzira iritsiko den manifestazioan parte hartzera, “Navalen etorkizuna eta Ezkerraldeko enplegua” aldarrikatzeko. “Navalek etorkizuna du, eta aukera garrantzitsua da eskualde osorako”.