Oyarzabal Realaren deialdian sartu da, PSGren aurkako hitzordurako

Mikel Oyarzabal Realeko aurrelaria eta kapitaina Imanol Alguacil entrenatzaileak asteazken honetako PSGren kontrako Txapeldunen Ligako partidarako egindako deialdian dago, eta hori da nobedade nagusia. 23 jokalarik egingo dute bidaia Parisera, final zortzirenetako norgehiagoka jokatzeko.

Jokalari gipuzkoarrak ezin izan du ligako azken bi partidetan parte hartu, arazo fisikoak direla medio: Mallorcaren aurka Errege Kopan, eta Osasunaren kontra, LaLiga EA Sportseko 24. jardunaldian.

Bestetik, Sheraldo Becker, Carlos Fernandez, Kieran Tierney, Alvaro Odriozola eta Aritz Elustondo baja dira oraindik. Elustondo, gainera, zigortuta dago Printzeen Parkeko joaneko partida honetarako.

Deialdiko zerrendan, honako jokalari hauek daude: Remiro, Marrero, Fraga, Zubimendi, Zubeldia, Barrenetxea, Merino, Oyazabal, Zakharyan, Kubo, Gonzalez de Zarate, Olasagasti, Traore, Sadiq, Pacheco, Andre Silva, Turrientes, Brais Mendez, Le Normand, Javi Galan, Magunazelaia, Pablo Marin eta Aramburu.