Laura Aznal: “Inbestidura abiapuntua da eta anbizio osoz goaz datorren legegintzaldira”

Laura Aznal EH Bilduren Nafarroako Parlamentuko bozeramalea "pozik" agertu da Maria Chivitek inbestidura gainditu eta gobernu akordioa lortu izanagatik. Koalizio abertzaleak ez du negoziaketa horietan parte hartu, baina Aznalek nabarmendu duenez orain, 9 parlamentarirekin eta ganberako hirugarren indar gisa, EH Bildu "indartsuagoa" da eta "aukera leiho bat ireki da" anbizioz jokatzeko.

Eskuinari atea itxi izana lehentasunezko jo du eta azpimarratu haientzat "oposizioan hirugarren legegintzaldia" izango dela. Hala ere, Aznalek adierazi duenez "hori ez da nahikoa" eta haien lehentasunak mahaiaren gainean jarriko dituzte "zerbitzu publikoak indartu eta hizkuntza politiketan ausardia handiagoz aurrera egiteko". Hizkuntza eskubideak "nafar guztiei bermatzea" eta autogobernuan "sakondu eta anbizio handiagoz lan egitea" premiazko jo ditu. Zentzu horretan, aukera ikusten du Geroa Baiko zazpi parlamentariekin lan egiteko eta funtsezkotzat jo du kaleko lana, mugimendu sozialen indarra.

Iruñeko Udalean zentsura mozio bat aurkezteko aukerez galdetuta, "oposiziotik arduraz lan egiteko" unea dela adierazi du Aznalek, baina EH Bildu "hitz egiteko prest" dagoela gaineratu du eta zehaztu "borondate politiko kontua" dela, haiek defendatu izan duten moduan, indar aurrerakoi bozkatuenak lidergoa hartzea, Iruñean ere.