Estropatadari buruzko argazki erakusketa hartu du Bilboko Metroak

Bilboko Metroak Estropatada ekimenari buruzko argazki erakusketa bat hartuko du ekainaren 30a arte. Indautxuko eta Moyuako geltokietan dago ikusgai.

Mikel Renteria The Walk On Project plataformako (Estropatada sustatzen duen elkartea) arduradunak gogorarazi du elkartasun ekimen horrek hiru edizio daramatzala jada, eta urte horietan argazki pilo egin direla. "Onenak bildu nahi izan ditugu, badakigulako herritarrek argazki harrigarriak egin dituztela. Hautaketa zaila izan da, argazki asko oso bereziak direlako", adierazi du.

Argazki erakusketaz gain, Ansioko geltokian 5 metroko ahate bat jarri dute, eta geltokietan bidaia-txartelak gordetzeko 25.000 funda banatuko dituzte.

Laugarren edizioa, ekainaren 26an

Festa solidario honen laugarren edizioa ekainaren 26an egingo dute.

"Disfrutatzea izango da helburua. Programa aberatsa antolatzen ari gara: kontzertuak, umeentzako tailerrak, gastronomia eskaintzak...", laburbildu du Mikel Renteriak.

Bildutako diru guztia endekapenezko gaixotasunen ikerketara bideratuko dute.