"Tokikoaren balioa" aldarrikatu du Elkarrekin Podemosek, "Euskadi bidezkoagoa" eraikitzeko

"Tokikoaren balioa" aldarrikatu du gaur Elkarrekin Podemos, Ezker Anitza-IU, Berdeak-Equo eta Aliantza Berdea taldeek maiatzaren 28ko udal eta foru hauteskundeei begira eratu duten koalizioak. Esan dutenez, tokikotasunetik "Euskadi bidezkoagoa eta demokratikoagoa" eraiki daiteke.

Donostiako Aquariumean egin duten ekitaldian, koalizioak adostu duen dokumentu nagusia aurkeztu dute. Bertan, hauteskunde-programako 25 neurri nagusiak daude bilduta. Alor ezberdinetako eragileen ekarpenekin osatu dute dokumentua.

Ezkerreko koalizioa osatzen duten talde guztietako ordezkariak igo dira oholtzara azalpenak ematera. Hala nola, han izan dira Victor Lasa, David Nuño, Alba Garcia, Lorena Vicioso, Leticia Jimenez, Lidia Ucher eta Israel Escalante.

"Gertutasuna" dela euren programaren ardatza esan dute aurkezpenean. Herritarren "benetako beharrei" erantzunak ematea dela euren helburua nabardu dute, eta horretarako tokiko erakundeen garrantzia eta herritarren parte-hartzea bultzatuko dituzte.