Politika -
Donostia Ospitalean
Uribetxebarria, ospitalean berriro sabelaldean duen minagatik
Herrirako bozeramaile batek jakinarazi duenez, igandean Donostiako ospitaleko larrialdietara joan eta ospitaleratuta gelditu zen.
Erredakzioa
Josu Uribetxebarria Bolinaga baldintzapeko askatasuna duen ETAko presoa Donostia ospitalean dago berriro sabelaldean duen "min handi batengatik", orain hilabete eskas alta hartu eta gero.
Herrirako bozeramaile batek esan duenez, igandean, 20:00ak aldera Donostiako ospitaleko larrialdietara joan zen sabelaldean "min handia" zuelako. Ingresatuta gelditu zen eta atzo hainbat proga egin zizkioten.
Uribetxebarriak minbizi sendaezina du, baina mina gaixotasunagatik edo "ahuleziarengatik" datorkion ez dakiela berretsi du iturriak.
Urriaren 23an hartu zuen alta Uribetxebarria Bolinagak, abuztuaren 1etik ospitalean egon ostean; hasieran preso gisa eta irailaren 19tik aurrera, baldintzapeko askatasuna eman ostean, gaixo arrunt moduan.
Ospitaletik atera zenean, omenaldia egin zioten Arrasaten (Gipuzkoa), eta AVT Terrorismoaren Biktimen Elkarteak kereila bat jarri zuen terrorismoa goraipatu zuela iritzita. Atzo bertan, Auzitegi Nazionaleko Fiskaltzak instrukzioko bosgarren zenbakiko epaitegiari omenaldian parte hartu zuten lagunen inguruko txostena Ertzaintzari eskatzeko esan zion, Terrorismoaren Biktimen Elkartearen kereila onartu ala ez erabaki baino lehen.
