Uribetxebarriak gose-greba hasi du bere egoera salatzeko

Josu Uribetxebarria ETAko presoak  gose-greba hasi du bere egoera salatzeko, Herrira presoen aldeko mugimenduak azaldu duenez. Presoak giltzurruneko minbizia dauka, eta orain metastasia ere antzeman diote. Horregatik, Donostia Ospitalera eraman dute, Leongo espetxetik.

Ekintza honen bidez, presoak Espainiako Gobernuak bere egoeraren aurrean “pauso bat bera ere ez” duela eman salatu nahi du, eta azken orduetan izandako arazo batzuen ostean, berarentzat eta bere familiarrentzat “tratu duina” eskatu du.

"Erabaki gogorra izango da niretzat, baina ez dago atzera egiterik", adierazi du Uribetxebarriak, Gara egunkariak egindako elkarrizketa batean.

"Nire egoeran egonda, ez dut uste asko luzatuko litzatekeenik. Gorrotoa horrenbesteraino heltzen bada, duintasunez hiltzea izango da nire asmoa", gaineratu du.

Uribetxebarriak gogorarazi duenez, "orain gaixo larria naiz eta euren legeen arabera eskubidea dut baldintzapeko askatasunean kaleratua izateko".

"Tratu justu eta duina bakarrik eskatzen dut, legeak jasotzen duena, nahiz eta euren interesen arabera aplikatu. Ni ez naiz joko horretan sartuko", nabarmendu du.

ETAren biktima bati zer esango liokeen galdetuta, presoak erantzun du "elkar ez ulertzeak" ez duela "laguntzen", eta hori ez dela "bidea". "Baina bai, hitz egiteak laguntzen duela esango nieke ETAren biktimei; bidea ez ixteko, badaudela minimo batzuk ados egoteko modukoak direnak eta hortik hasi behar dugula, gero eta bide sendoagoa egiteko. Bakoitzak bere ideiekin baina errespetuz eta tolerantziaz, elkar bizitza bat lortu arte gutxienez", amaitu du.