Etxeratek bilera-sorta egingo du preso gaixoen egoera salatzeko

Etxerat ETAko presoen senitartekoen elkarteak bilera-sorta abiatuko du datozen egunetan. Horrela, alderdi politikoekin, Arartekoarekin eta Nafarroako Herriaren Defentsariarekin batzartuko da, ETAko preso gaixoen egoeraren aurrean, "salaketa eta erantzun bateratua" lortzeko.

Mattin Troitiño eta Izaskun Abaigar Etxerateko bozeramaileek prentsaurrekoa eskaini dute Arrasateko Udaletxean (Gipuzkoan), Josu Uribetxeberriaren egoera larria salatzeko. Uribetxeberriak bederatzi egun darama ospitalean. 2005. urtetik minbizia du giltzurrunean, eta ondoren, beste bi nodulu antzeman diote, bata, buruan eta bestea, birikan. Gaixotasun larria duenez espetxetik irteteko eskaera egin zuten baina ezezkoa eman zioten 2007an. Etxeraten ustez, ebazpen honek "heriotza zigorra" suposatu du presoarentzat. "Ez ditugu inor bere erantzukizunetik aske utziko: ez espetxeetako politika diseinatu zutenak, ez politika hura betearazi dutenak, ez horien konplizeak ere. Ezin dugu hura egin eta ez dugu ere nahi", azpimarratu du elkarte honek, "Josu eta gaixotasun larriak dituzten beste 13 preso kartzelan daude oraindik eta aske egon beharko zuketen". Etxeratek hauek "berehala aske uzteko" eskatu du.