Politika -
Katalunia
Artadi: 'Sanchez behin behineko presidentea da, Puigdemont inbestitu bitartean'
"Puigdemont JxCaten hautagaia da beti", esan du, eta Sanchezen inbestidura saioa lehenbailehen deitzeko eskatu dio Torrenti, Gorenak erabaki bat hartzera behartzeko, NBEren ebazpenaren ostean.
agentziak | erredakzioa
Elsa Artadi JxCaten Parlamentuko bozeramaleak Carles Puigdemont Generalitateko presidente izateko hautagaitza defendatu du, nahiz eta gaur egun hautagaia Jordi Sanchez izan: "Sanchez behin behineko presidentea da, Puigdemont inbestitu bitartean".
"Puigdemont JxCaten hautagaia da beti", gaineratu du Catalunya Radion egindako elkarrizketa batean, Europa Pressen arabera. Gainera, Gerard Gomez del Moral eta Carles Riera ERC eta CUPen diputatuak ere, hurrenez hurren, izan dira.
Artadik gogorarazi duenez, Generalitateko Presidentetza Legea erreformatzen saiatzen ari dira Puigdemont presidente izatea ahalbidetzeko, nahiz eta Parlamentuan ez egon, eta -bere ustean- legearen testuak Estatutuaren Batzorde Bermatzailean bukatu du, "ez zerbait gaizki dagoelako, baizik eta -talde ez independentisten- oztopatze kanpainaren parte delako".
Era berean, Roger Torrent Parlamentuko presidenteari Sanchezen inbestidura saioa lehenbailehen deitzea eskatu dio, Auzitegi Gorena -behin behineko espetxealdian du- NBEren ebazpenaren ostean (eskubide politkoak errespetatzea eskatu zuen) iritzia ematera behartzeko.
Puigdemont, Elsa Artadiren ondoan, Berlinen. Argazkia: EFE
"Datarik izan gabe, Llarenak egin dezakeena da jesarri, Jordi Sanchez gaitasungabetu arte itxaron eta gero esan 'Orain ez da beharrezkoa", ohartarazi du.
Bestalde, Carles Riera CUPeko diputatuak Puigdemont presidente izendatzea defendatu du, "Estatuak nahi ez duen hautagaia baita", eta CUPen lau diputatuen babesa bermatu dio.
Rieraren iritzian, Estatuak ez du Generalitateko presidentegaia onartu behar, baizik eta "Parlamentuak erabakitzen duena egin behar da".
Gerard Gomez del Moral ERCko ordezkaria, horren ildotik, Puigdemonten hautagaitza erreserban mantentzearen alde agertu da, baina "erakundeak berreskuratzeko inbestidura eraginkorra izatea" defendatu du.
"Ezin diogu garrantzia kendu Mariano Rajoy eta Soraya Saenz de Santamaria gugan agintzen ari diren egoerari", kritikatu, eta Katalunian hauteskundeak berriz ez errepikatzea eskatu du.
