Puigdemontek kartzelatuak askatzeko eskatu du: 'Bozen aurkako kolpea da'

Carles Puigdemont presidenteak ostegun honetan kartzelatutako kontseilari kargugabetuak askatzeko eskatu du, eta horiek espetxetzeko agindua "abenduaren 21eko hauteskundeen aurkako kolpea" dela ohartarazi du, "Europan aurrekaririk gabeko klima batean" eman baita. Gainera, espetxeratzeak demokraziaren aurkakoak direla salatu du.

Belgikan grabatu eta TV3k zabaldutako mezu batean, Puigdemontek esan du "demokraziaren aurkako eraso oso larria" dela buruzagi politikoak espetxeratzea, hauteskundeetan agindutakoa eta Kataluniako Parlamentuan hartutako konpromisoa betetzeagatik. Horrek guztiak "demokraziaren oinarrizko printzipioak hausten ditu", erantsi du.

"Espainiako Gobernuak uko egin dio elkarrizketari, eta elkarrizketa ezinbestekoa da arazo politikoak konpontzeko", adierazi du. Polizia indarkeria erabilita eta espetxeratzeko aginduak emanda, Espainiako Estatuak "errepresioaren aldeko apustua" egin duela ohartarazi du.

Espainia Zuzenbide Estatua balitz, horrelako espetxeratzerik ez zela egongo esan du, eta honakoa gaineratu du: "Irailaren 27ko hauteskundeetan herritarrek demokratikoki aukeratutako Kataluniako Gobernu legitimoaren presidente naizen heinean, kontseilariak eta presidenteordea askatzeko exijitzen dut; aukera politiko guztiak errespetatzea exijitzen dut, eta errepresio politikoa amaitzea exijitzen dut”.

Abenduaren 21eko hauteskundeak "XXI. mendeko Europa demokratikoan onartezinak diren eta aurrekaririk ez duten espetxeratze eta errepresio klima baten baitan" egingo direla salatu du.

Horrenbestez, Kataluniako gatazka politikoa "jada ez da Espainiaren barne arazoa", nazioarte mailako arazoa da, eta "bereziki Europan" ohartu behar dira "Espainiako Estatuaren jarreraren arriskuaz".

Amaitu aurretik, Puigdemontek beste bi mezu igorri ditu. Lehendabizi, "deliturik egin gabe espetxeratuak" izan diren kontseilarien familiei zuzendu zaie, bere babesa eta berarekin batera Bruselan dauden gainerako kontseilarien babesa helarazteko, baita hori guztia "harri eta zur" jarraitzen ari diren munduko beste pertsona askorena ere.

Bigarren mezua, berriz, Kataluniako herritarrentzako izan da: "Errepresio luzea eta izugarria datorkigu, baina aurre egingo diogu, makaldu gabe, modu baketsuan, indarkeriarik gabe eta iritzi eta pertsona guztiak errespetatuta".

"Espainiako Estatuak bortizkeriaz kolpatu gaitu, zoratuta ari da dena mehatxatuz”, salatu du.

Ildo horretan, Puigdemontek azpimarratu du Kataluniaren askatasuna ezinezkoa izango dela, katalanak euren ideiak defendatzeko eta konpromiso demokratikoak betetzeko libre ez badira.

"Barrote artean ere Kataluniako Gobernu legitimoa giltzapetzea agindu dutenak baino askoz duinagoa da. Visca Catalunya!", gaineratu du.

Oriol Junqueras Kataluniako presidenteorde kargugabetua eta beste zazpi kontseilari kargugabetu fidantzarik gabe espetxera bidali ditu Carmen Lamela Auzitegi Nazionaleko epaileak. Santi Vila kontseilari kargugabetuari, ostera, 50.000 euroko bermea ezarri dio, kartzela saihesteko.

Junqueras, Rull eta Turullen mezuak

Oriol Junqueras Generalitateko presidenteorde eta Ekonomia kontseilari kargugabetuak "A-21eko hauteskundeetan ongiak gaiztakeria garaitzea" eskatu du Twitter sare sozialaren bidez.

"A-21eko hauteskundeetan ongiak gaiztakeria garaitzeko egunero eskura duzuen guztia egin. Zutik, ausart, garaipena lortu arte", esan du mezu batean, epaileak espetxera bidali ondoren.

 

Raul Romeva Nazioarteko Gaietarako kontseilari kargugabetuak ondokoa idatzi du Twitterren, espetxeratu aurretik: "Demokraziaren bidea hartu genuen, eta ez dugu bide hori utziko. Abenduaren 21ean elkartuko gara berriro. Hautetsontziek gainezka egin dezatela".

Antonio Comin Osasun kontseilari kargugabetua Bruselan dago, Carles Puigdemontekin batera, eta mezu hau idatzi du Twitterren: "Ez dugu atsedenik hartuko zuei askatasuna itzuli arte. Zuen ausardia izango da gaurtik aurrera gure borrokaren motor indartsua. Demokraziaren, justiziaren eta duintasunaren aldeko borroka".

Bestalde, Josep Rull Lurralde kontseilari kargugabetuak argazki bat argitaratu du sare sozial horretan, urriaren 1eko erreferendumean botoa ematen erakusten duen irudi batekin batera. "Txio hau ikusten baduzue, hautetsontziei fidel izateagatik espetxeratu nautelako da", esan du.

Kataluniarren aginduari leial izateagatik espetxeratu dutela adierazi du Jordi Turull kontseilari kargugabetuak. "Demokrazia eta Kataluniaren duintasunaren defentsa baketsua" eskatu du Turullek horren aurrean.

Kataluniako herriarekin, Puigdemontekin, Generalitatearekin eta Parlamentuarekin leial jokatu duela ziurtatu du Turullek Twitter sare sozialean.

Horregatik, demokrazia eta Kataluniaren duintasuna modu baketsuan defendatzea eskatu du: "Kataluniako herriarengan itxaropen eta konfiantza osoa daukat. Ez du sekula huts egin, ezta orain ere”.

Ondo dagoela esan die lagun eta senideei, eta berak egindakoa "ez da delitua" eta "ez diot inori minik egin" azaldu ondoren, ez sufritzeko eskatu die.

"Maite zaituztet", "Gora demokrazia" eta "Gora Katalunia" esanez amaitu du bere mezua.