Elkarrizketaren eta bitartekaritzaren aldeko apustua berretsi du Urkulluk

Iñigo Urkullu lehendakariak gaur Eusko Legebiltzarreko kontrol saioan adierazi duenez, independentzia Euskadin eta Katalunian "errotuta" dagoen "helburu legitimoa da", baina "gatazka" eragozteko eta eskaerak "elkarrizketaren" bitartez bideratzeko eta, behar izanez gero, "bitartekaritza" baliatzeko beharra nabarmendu du. Halaber, Estatuko segurtasun indarrek erabilitako 'indarkeria' kritikatueta aldebikotasunaren eta adostasunaren aldeko jarrera berretsi du.

Autogobernuari eta Kataluniako auziari buruz Eusko Legebiltzarreko taldeek egin dizkioten galderak erantzun ditu Urkulluk gaurko kontrol saioan.

Lehendakariak "elkarrizketaren, akordioaren eta aldebikotasunaren" aldeko bere apustua berretsi du lurralde eztabaidari heltzeko. Haren esanetan, independentzia jomuga legitimoa izanik ere, beharrezkoa da "gatazka saihestea". Halaber, erabakitzeko eskubidea Euskadin eta Katalunian errotuta dagoen eskaria dela azpimarratu du.

Edozein kasutan, gai hori elkarrizketaren eta fede oneko negoziazioaren bitartez bideratu behar dela nabarmendu du, akordioa egotekotan Konstituzioaren erreforma abiatzeko, "erreferenduma egin ostean independentzia ahalbideratuko duena".

EH Bilduren galdera bati erantzunez, Estatuko Segurtasun Indarrek urriaren 1ean Katalunian erabilitako "indarkeria" kritikatu du lehendakariak. Jokabide horren aurrean, elkarrizketaren, aldebikotasunaren eta adostasunaren aldeko apustua berretsi du herritarrek beren iritzia eman dezaten.

Halaber, "irtenbide hitzartua" eta, eskatuz gero, Kataluniako eta Espainiako erakundeen arteko "bitartekaritza" galdegin ditu. "Ez naiz eserita geldituko trenek talka nola egiten duten eta errailetik nola ateratzen diren ikusteko; nahiago dut errealismotik eta akordiorako borondatetik abiatuta konponbideak aurkitzen saiatu, bai nire hitzaldi publikoetan eta baita ez direnetan ere", gaineratu du.

Maddalen Iriarte EH Bilduk Eusko Legebiltzarrean duen bozeramaileak lehendakariari ziurtatu dionez, bere koalizioak Estatu espainiarrarekin gai horiez "negoziatu eta adostu" nahiko luke, baina haren esanetan, ez da posible. Haren esanetan, Espainia "bukle zital infinitu" batean murgilduta dago.