Alabarekin denbora gehiago egoteko baimena eman diote Sara Majarenasi

Espetxe Zaintzako Jose Luis Castro epaileak alaba gehiagotan eta denbora gehiagoz ikusi ahal izateko baimena eman dio Sara Majarenas preso donostiarrari. Haren alaba Valentziako La Fe ospitalean dago pasa den urtarrilaren 12az geroztik, hain zuzen ere, aitak labanaz zauritu zuenetik. Presoari eman dioten baimen horren helburua amak alabarekin ahalik eta "denbora gehien" igarotzea da.

Epaileak bere autoan, ama-alabak ahalik eta denbora gehien eta behar den guztietan elkarrekin egoteko bitartekoak jartzeko agindu du, beti ere bisiten inguruko barne araudia eta Poliziaren zaintza errespetatuz. Halaber, alabaren egoeraren inguruko edozein berri amari jakinarazi behar zaiola ebatzi du epaileak.

Ospitalean zegoen bitartean alaba gehiagotan ikusteko baimena eskatu zion presoak epaileari eta eskaria onartu egin zion. Espetxe irteera horiek epailearen baimenik gabe, baina beharrezko segurtasun neurriak errespetatuz egitea agindu zuen.

Baimen berezi horrez gain, alabaren osasun egoera hobetu bitartean aske uzteko eskatu zion presoak epaileari. Hala ere, Espetxe Zaintzako epaileak behin-behinean zigorra etetea ukatu dio, bisita gehiago izateko baimenarekin nahikoa dela iritzita.

Sara Majarenas euskal presoa Picassenteko espetxean ari da zigorra betetzen, eta alabarekin bizi da han. Aitak eraso egin zion asteburuan, ordea, espetxetik atera zen.